جهاد الشيخ صليب جون
حبايبي الحلوين
ازيكو؟
ياتري صاحيين للي بيحصل ولا نايمين؟
معانا في الطين مغروسين؟
ولا في الساحل وتماراي والسخنة مهيسيين؟
قصره!
حدوتة اليوم
مش زي اي يوم
حدوتة عن 3 ولاد
نادرا اصحاب
وساعات بيعضوا في بعض زي الكلاب
النهارة بالفصحي يعني اليوم
واليوم هو يوم الجمعة
الجو جميل والسماء صافية
الملعب مليان جمهور
الفريق نازل الملعب والجماهير مستنية
في اللي قاعد ومركز
وفي اللي شايل شومته جنبه مستني ينزل يكسر
وفي اللي بيقزقز لب ومش عارف مين بيلاعب مين ولا ده ماتش ايه اصلا!
في اللي قاعد في المقصورة الرئيسية
واللي بيتخانق عشان يدخلها
واللي دخلها فعلا وقعد جنب جماهير النخبة
واللي دخل وكمان عايز يطرد اللي كانو موجودين
واللي دخل ومش عايز يطردهم ..
بس عايز يعدمهم!
وفي اللي جاي يسترزق نفسه يبيع ولاعة,علبة سجاير او مطواة قرن غزال
وكله حسب نوعية المشتري
اللي فيهم بيبيع ويشتري
مقصورة الاعلام مليانة
فيها ناس تعبانة
وناس جعانة وعالم مليانة
وناس اكتر من اللي بيحصل قرفانة
وناس اصلا مش مقدرة ولا دريانة
في اودة اللبس خناقة
من يوم الدين
تعالوا نعرف اطرافها مين
ولد اسمه جون طول عمره بيلعب ونفسه يجيب جون
وولد اسمه جهاد طول عمره بيزن علي روس العباد
اما الشيخ فاسمه اصلا اسامه
والناس سمته الشيخ من كتر مالبس العمامة
اما ابونا صليب قلبه مش صافي قوي زي لبن الحليب
جون قالوله هتقف جون
قالهم لأ الحق حق .
.انا لازم العب يأما هروح لابويا اعيط
جهاد بيعارض..
هو الوحيد اللي كان من الاول موجود..
بيلعب مع الكبار في الملعب..حتي لو كتير ضربوه او طردوه
بيقول ده حقي..انتو ماوقفتوش جنبي
وانا معايا حبايبي
معايا واقفين بخطتي مقتنعين
الواد اسامة اللي سموه الشيخ من لبسه العمامة
شوية مع جهاد لان زنه امر من السحرعلي رؤس العباد
شوية ضده بيشتم فيه والناس اللي بتشكر فيه
كده ولا كده الشيخ مش بيطيق جون
ونفسه يولع في صليب زي المجنون
صليب قال انا عايز حكم دولي بس جون متردد
اما الشيخ بيقول الملعب ملعبنا والغرب هتيجي تحكمنا؟
جهاد من اللي بيحصل مبسوط لانه بكده ضامن الف صوت وصوت
قصره الملعب مفتوح
والجماهير دماغها كمان مفتوح
نسيت اقولكم علي اخر ولد
اللي فيه زيه كتير في البلد
الواد محروس الموكوس
اللي قاعد عالدكة
بيعيط ويصوت
سألناه ليه مالك؟
قال انا عايز انزل الملعب بس الطريق مش سالك
جهاد زنان
الشيخ بيخوفني
صليب بيصدعني
جون عقله تعبان
كلنا استغربنا وكمان ضحكنا
لما الملعب مش عاجبك واللي فيه كلهم ضدك..ليه ماتنزلش؟
وتبدل هذا الوش
انزل ...العب..زاحم..لازم!
بس للاسف ..مع كل الاسف..
جايز محروس رأيه صح
لكن دماغه بح
مش عايز ينزل وبيجعجع بس
مع ان الملعب فاضي يساع من اللعيبة كتييير
والمشجعين ناصحين مش حمير
بس طول ما محروس موكوس
يتحجج مرة بالزن ومرة بالفلوس
جون هيفضل يزن
والشيخ اسامة لابس العمامة
وجون هيفضل يحارب عايز يجيب جون
وجهاد هيزن علي دماغ العباد
والمقصورة عالحرامية مقصورة
والاعلام فيه النايم وفيه التعبان واللي بالشر مليان
اما ياعيني المشجع اللي بيقزقز لب
واللي بشومته فوق الروس هيدب
كل دول مش داريين
بنوع قديم من المشجعين
اللي زهق وصدع
من الكلام الذي لاينفع
الجعان التعبان
اللي دور في جيبه مالقهوش مليان
وبالخروم مليان
شوية هيبص عالملعب
بغيظ وغضب
وعالكورة واللي بيلعبوها قلب
هينزل يكسر يدمر
ومش هيحترم الحكم الحامي
ايو شورت كاكي
بتاع الاجندة والكنتاكي
اللي فهمنا انه معانا
حامي حمي قضايانا
وانه هيسيب الملعب نضيف
بس اللي شايفينه مخيف
ومش ظريف
هيعمل ايه الحكم مع المشجع
اللي مش بيشجع
الجعان الزهقان
بالغل من كل الملعب مليان
خلاص وصل لدرجة الغليان
هيقدر عالطوفان؟
طوفان من الغضب محدش عليه قادر
لأن ياحبايبي الجوع كافر
ماياكلوش ماتش الكورة
ولازن جهاد فوق روس العباد
ولا بيطيق صليب
والشيخ بكلامه فلقه
وجون خنقه
مش بقولكم طوفان
ومحدش عليه قادر
يا حبيبي خليكم فاكرين
الجوع كافر
والجهل كمان كافر
ومن لؤم الحكم واللعيبة ياساتر
ياساتر
