يكفي ان تنتمي لهذه المؤسسة كي تشعر بفخر لا مثيل له
من منا لايوجد في عائلته بطل ممن حارب مع جيشنا المصري العظيم؟
انا نفسي عائلتي نصها تربية وتعليم ونصها يتبعون الجيش المصري سواء بالانتماء له والعمل ضمن هيئاته او يحملون ذكري المشاركة في حرب من حروبنا المقدسة
عندما تسمع كلمة الجيش ...ماهي اول فكرة او انطباع يتكون عندك؟
اكاد اجزم انها مشاهد من حرب اكتوبر
او ذكريات من معاناة النكسة
او العدوان الثلاتي
او حتي خطبة حماسية من خطب عبد الناصر
طيب ده شئ جميل قوي
بفتكر اهلي-كبار السن بالذات- بمجرد انتقاد المجلس العسكري اواجه بسيل من الشتائم وقلة الادب واتهامات بالجحود وان المجلس ده رمز الجيش المصري العظيم المقدس ذو التاريخ العريق الحافل بالبطولات!
حد سأل نفسه ليه لما بتيجي سيرة الجيش كل ذكرياتنا عنه من حقبة الستينات والسبعينات فقط؟
ليه عصر الجيش الذهبي ايام عبد الناصر والسادات بس؟
امال الجيش ايام حسني كانت شغلته ايه؟؟
لكل الناس اللي كانت بتعارضني لما كنت اقول انتقاد المجلس لا يقلل من عظمة الجيش ولا يعني انتقاده.....انا اسف انتو معاكم حق والتدوينة دي مهداة اليكم!
جيشنا بقي جيش الحق
ماذا حدث للجيش في عهد مبارك؟؟
كيف تحول جيش المعجزات الي جيش مصانع المكرونة ونوادي الافراح والليالي الملاح؟؟
الجيش المصري هو أول وأقدم جيش نظامي في العالم تأسس قبل 7000 سنة فقد وجد في مصر أحد أقدم الجيوش النظامية في العالم.....ده كلام ويكيبيديا مش كلامي علي فكرة
هذا الجيش العريق لا اخجل اني اقولها صراحة اني تنفست الصعداء عندما "نجوت" من تجنيده الالزامي لمدة٣ سنين
حد عارف كام واحد بيقدم في الكلية الحربية كل سنة؟؟ ....العدد في الليمون طبعا
كام واحد في الناس دي كلها ملهوف علي دخول الحربية عشان ينتمي للجيش المصري العظيم اقدم جيش نظامي في العالم؟
طب وكام واحد قدم في الحربية عشان مجموعه خايب مايدخلوش اي كلية محترمة؟
كام واحد بيبص للحربية والجيش علي انها"نقلة" اجتماعية هتنقله من طبقة متوسطة او تحت متوسطة الي طبقة اعلي وتكسبه وجاهة اجتماعية؟
كام واحد بيقدم في الحربية وبيحلم بالشقة....والمرتب...والبعثات والسفريات لامريكا...والمعاش المحترم....والنوادي و و و و....؟
كام مرة سمعت ان بابا مبارك عهده عهد السلام وان فكرة اننا نطلع القمر اكثر تصديقا وواقعية من فكرة اي مواجهة عسكرية؟
كام واحد داخل الجيش يتطوع وهو مطمئن ان عمره ماهنحارب وانه مرتبات الجيش"حلوة" واهي احسن من الصياعة ؟
كام واحد دخل الجيش مجند ومعاه مؤهل عالي واتعامل اوسخ معاملة من صول ساقط اعدادية ودفعله رشاوي عشان ياخد اجازة؟
الوسايط
للتظبيط في السلاح
ابن الباشا المسنود في الكفاح الشعبي ....مدرسة من ٩ ل٢ ويروح ينام في حضن ماما
وابن الكلب مشاة ولا مدفعية في السلوم
الكشف الطبي....فاكره؟؟ كان ادمي جدا صح؟؟
حد فهمك ان سر تفوق الجيش عسكريا هو اهانة ادميتك "عشان تنشف"؟؟
كام اب وام باعوا اللي وراهم واللي قدامهم عشان يدفعوه لحد"واصل" يعدي ابنهم من كشف الهيئة؟؟
ايه؟؟؟ اتخضيت؟؟ ماتعرفش؟؟ ماسمعتش عن سماسرة الكليات العسكرية والشرطة؟؟
مصدق ومقتنع ان الفساد ماعرفش طريقه لهناك كمان؟؟
طيب بلاش ماتزعلش الجيش طاهر وهيفضل طول عمره طاهر
مش بشكك لا سمح الله في نزاهة وعراقة جيشنا
بس الموضوع نسبي وفكر شوية
نسبة الناس من العينة اللي فوق بتاعة جيش بابا حسني بتاع المكرونة اللي بيأكل نفسه ويأكلنا وافضاله علينا ومش بياخد حاجة من الدولة لانه بيصرف علي نفس-علي اساس ان المعونة مش من مصر فعلا!-لنسبة الناس الوطنية اللي التحقت بالجيش حبا فيه وتضحية من اجل مصر فعلا
ماسمعتش الكلام ده من ناس شغالة في الجيش قبل كده؟
طب عندك فكرة عن طريقة اختيار الترقيات والبعثات في الجيش؟....ولا انا الصراحة
طيب عالعموم ده رأيي
انا شايف ان الثورة تتعارض بشكل اساسي مع مصلحة المؤسسة العسكرية ومستقبل استقلالها.....بالبلدي كده "دلع بابا حسني" راح وراحت ايامه
انا حر وده رأيي اللي بنيته من خبرتي الشخصية واحتكاكي بها عن قرب.....قوي:)
وماقولتش اسرار عسكرية
ولا ده كلام جواسيس وخونة وناس عايزة تولع البلد علي فكرة
ده كلام كلنا عارفينه
بعضنا مش عاجبه
بعضنا عاجبه لان نايبة من الحب جانب..منتفع يعني
بعضنا مكبر دماغه كالعادة
الجيش المصري عظيم
وعريق وضحي ويضحي وسيضحي بكل ماهو غالي وعزيز من اجل هذا البلد ده مش كلام اغاني عبحليم وشادية دي حقيقة
جيشنا المصري جيش الحق
بس ملوث بالف مبارك داخله...
