للأسف اكثر الشعب المصري لايعجبه ان يواجه بما فيه من عيوب ويفضل دائماً ان يعتقد انه شعب غالبيته متسامح متصالح مع نفسه ومع الاخرين ممن يختلفون عنه
اذا سألت اي شخص مهتم بالتاريخ المصري عن اعظم صفات النسيج المصري لجاوبك بلا تردد او تفكير...."التنوع "
انا عن نفسي اكثر حاجة شدتني لدراسة التاريخ في المدرسة هي عظمة المجتمع المصري في تقبله مختلف الثقافات والخلفيات بل وانصهارها في سبيكة واحدة اسمها الشعب المصري
مسلم
مسيحي
ارمني
تركي
من بلاد الحجاز او الشام او اوروبا
كله عاش وانصهر في مصر ولم ترفضه الشخصية المصرية طالما يصب في المصلحة العامة ويعزز الشخصية المميزة المتسامحة
اللي يرجع للتاريخ هيلاقي مصر جمعت تقريبا كل الملل والثقافات والأشكال والأجناس بل وجه وقت كان ممكن كاتب ينشر كتاب اسمه"لماذا انا ملحد" ويكون الرد عليه بكتاب برضه اسمه"لماذا انا مسلم" بدون ١٣٣٦ فتوي بإهدار دمه او قضايا حسبة او شاب يطعنه بخنجر وهو خارج رايح شغله الصبح
لو تأملت الشخصية المصرية اللي بتكلم عليها ..........وبصيت حواليك دلوقتي .....هل ممكن تلاقيها بسهولة؟
هل ممكن تلاقيها اصلا؟!
يحضرني موقف لامي رحمها الله لم ولن انساه طول مانا عايش
يمكن الفكرة مستهلكة ومحروقة في١٠٠ فيلم قبل كده ويمكن عشان والدتي توفت وانا طفل الموقف فضل معلق معايا ومش قادر انساه بس كل اللي اعرفه ان اللي حصل اليوم ده كان من اهم العوامل والمبادئ اللي شكلت شخصيتي لغاية دلوقتي..
اعتقد كان عندي٧ او٦ سنين كمان
وكنا أيامها عايشين في السعودية
وراجعين من المدرسة انا وامي
ومكنتش بشوف اي مواطنين سعوديين الصراحة...بحكم انغلاق اهلي في الكومباوند اللي كنا ساكنين فيه....كنت أشوف الأمريكان اللي مع بابا في الشغل او سوريين او لبنانيين جيراننا
اليوم ده دخلنا السويرماركت واشتريت كيس ام اند امز....عارفينه؟ اللي هو في مصر الشيكوبون اللي هو شيكولاته مغلفة بالسكاكر الملونة في الفصحي:))
المهم يومها بصيت للبياع الهندي وتنحت له جامد...كنت فاكر هما دول السعوديين
أمي لاحظت وشخطت فيا وشدتني بره المحل وفضلت ساكت بفكر طول ماحنا راجعين في السكة ولغاية باب العمارة...أمي لاحظت استغربت جداً...ايه الواد اللي مابيطلش كلام ولماضة سكت فجأة كده ليه؟ا
اول مادخلنا الشقة سألتها فجأة:ماما مش المفروض ربنا حقاني؟؟
أمي استغربت السؤال وردت ببطئ عشان حاسة أني هدبسها في مصيبة كالعادة في السؤال اللي بعده...ايوة ياحبيبي الله اسمه العدل
قلتلها:مش باين ده مش حقاني خالص
طبعا أمي وشها احمر وقالتلي انت اتجنت؟! حد يقول كده علي ربنا؟! عايز تروح النار؟
بصتلهاشوية وبعدين قلت: ليه ربنا بيخلق ناس حلوة قوي وناس شكلها وحش ؟ مش حرام يخلق ناس بيضة وناس سودةالناس تتقرف منهم؟
الصراحة أمي اتاخدت من السؤال لحظة
أمي لاتنقصها الثقافة الدينيةاللازمة وكان من الممكن تخطب فيا وتقولي كام أية قرانية علي كام حديث وكنت هبصلها بهبل ومش هفهم ولا هقتنع الصراحة
لكن بصت للكيس اللي في ايدي وقالتلي تعالي وقعدنا عالسفرة وفضت الكيس كله عالتربيزة وبعدين قاتلي بص وركز...ايه ده؟ قتلها ام اند امز ...قاتلي ايوة انا عارفة بس معمول من ايه اصلا؟
رديت ببراءة وقلت شيكولاته
مسكت واحدة صفرا قاتلي دي شيكولاته؟ قلت اه
وواحدة خضرا قلتلها اه وهكذا كل الألوان...
يعني كلهم شيكولاته اصلا؟ قلتلها اه
طب ليه انت بتحب اللي لونها احمر وشريف اخوك مش بيحبها وبيحب الخضرا؟
سكت شوية وقلتلها عادي يعني براحته
قالتلي بص كلنا معمولين من نفس الحاجة اللي هي نفس اللون...كلنا نفس الطين.... بس في ناس لونها ابيض وناس لونها اصفر وعيب انك تقول علي اي حاجة خلقها ربنا وحشة لانها في الاخر معمولة من نفس الحاجة اللي انت معمول منها واذا كنت انت مش بتحبها في غيرك هيحبها ولما تعرف اننا كلنا معمولين من شيكولاته هتقول علي حد أوحش من حد او مش زي حد بعد كده؟
ابتسمت وسكت
كطفل عنده ٧سنين اقتنعت وانت كشخص بالغ دلوقتي ممكن تسخر من حكمة أمي بس الحقيقة الست دي أثرت فيا طول حياتي
عمري ماكان عندي مشكلة مع حد مش شبهي
ولا اللي مش علي ديانتي
والموضوع تتطور تدريجيا كل مااكبر وافهم
السؤال هنا بقي .....مين بيغرز في ولاده ان الناس كلها فعلا سواسية؟
مين بيهتم قبل مايبعت ولاده المسجد يحفظوا القران كله وهما أطفال لسه عشان يتفشخر بيهم قدام اهله وأصحابه وجيرانه ان الاطفال دي فاهمة ابسط معاني وقيم الدين وهي التسامح وتقبل الاخر؟
مين ابنه ماسمعوش بيتريق علي دين جاره؟
علي شعائرهم
علي لبسهم
علي بلدهم؟
افتكر بعد ما أمي ماتت مات بعدها ابويا بفترة صغيرة واضطريت اغير مكان إقامتي ومدرستي كل سنة او سنتين تقريبا
مانصدمتش لما رجعت مصر وقعدت سنتين في نفس الفصل ونفس المكان وسط ولدين مسحيين
وكانت اول مرة أشوف حد مش مسلم وانا عندي ٨ سنين
والصدفة المدهشة انه يتكرر في الاعدادي وشوية شوية طبقته علي اي حاجة مشابهة في حياتي
وتعاملي مع الأجانب وغيره وغيره
حتي في رحلات المدرسة....كنت أشوف الفضول هيموت الاطفال اللي في سني وهما بيتفرجوا عالخواجات وكأنهم مخلوقات فضائية
اسمع الناس بتردد اساطير علي الرهبان والقسس
واسمع المسحيين بيقولوا تخاريف تموت من الضحك عالمسلمين
اقف في الصلاة والشيخ يدعي عاليهود ومقولش امين لانه المفروض يقول الصهاينة مش اليهود
اروحله بعد الصلاة اكلمه وصحابي تضحك علي هبلي
اسمع الناس بتشتم اي حد مختلف...
عشان شعره طويل
عشان لابس سلسلة
عشان مش مسلم
عشان شيعي
طبعا مابقولش أني ملاك يمشي علي الارض أكيد قلت حاجات ندمت عليها وعندي من النواقص البشرية مايكفي لملئ استاد القاهرة...عادي يعني:)
بس عمري ماكنت عنصري
وبعدين بقيت اتحسر علي الشخصية المصرية ازاي اتحولت من شخصية غنية ومليانة اصول من كل الدنيا الي شخصية محدودة الافق والتفكير تكره كل ماهو مختلف عنها وتستمع الي الآراء الشوفونية بمنتهي الرضا علي انها منتهي الايمان والتدين
ناس هترمي المسئولية علي الخليج والهجرة والتيار الوهابي
ناس هتقولك ماهي الكنيسة متقوقعة علي نفسها وعاملة دولة داخل دولة
ناس هتقولك النظام البائد كان يتغذي علي اذكاء الفتنة
الحقيقة السخيفة ان محدش عايز يغلط نفسه
ولو كل اب وكل ام قعدوا مرة في العمر مع ولادهم
وعلموهم يعني ايه ان الدنيا
إحنا وبس
وهنشوف ناس غيرنا
وده مش عيب
واحنا مش احسن من حد عشان اللي ورثناه من اللي قبلنا سواء كان دين او حسب ونسب او مال
لو كل اسرة غرزت في أولادها ثقافة الشيكوبون والام اند امز
مكانش ده بقي حالنا
وهي دي ثقافة الشيكوبون:))
