الصبح
في الشغل
في الحمام
وانا سايق
وانا راجع البيت وطالع عالسلم
عالقهوة مع صحابي
في طابور في اي مصلحة حكومية
وانا نايم علي ضهري ومبحلق في سقف الاودة
تعمل ايه ياواد ياتامر لو انت مكان عصام شرف؟؟؟
اول خاطر وأول اجابة بتيجي علي بالي طبعا......جلطة وشلل رباعي وينقلوني جنب حسني في المستشفي(ده لو حسني يوافق طبعا)
بس بجد كل مرة اسمع ناس بتشتم في الراجل اسألهم السؤال ده....طب لو انتو مكانه تعملوا ايه؟؟؟ وغالبا مابخدش رد او كلام مصاطب او ممكن اتشتم انا بدل عصام شرف وابقي نجم القعدة في التهزيق
طب خلاص طالما المثل بيقول ابدأ بنفسك انا هسأل وارد علي نفسي
لو انا رئيس حكومة ثورجي هعمل ايه؟؟؟
وبعد تفكير وحيص وبيص ربنا هداني للنقاط الآتية واشمعني انا يعني؟!!
اولا: التركيز علي استقلال مجلس الوزراء التاااااام ويوم ماحد يميل عليا ويقولي اعمل دي وماتعملشي دي هشرشحله وأجرسه وأرمي استقالتي في وش امه!!
ثانيا:خطاب جماهيري الي الثوار في كل مصر(مش بس التحرير يابهايم)
خطاب يلهب الحماسة
خطاب موجه للشباب وليس الغرض منه اخلاء الميدان لان مطالبكم تحققت يا أخواني.....ابدا ابسلوتلي!!
والنبي مانتوا قايمين!! انا اطالب كل شباب الثوار بالتقديم في كلية الشرطة ...ايون كلية الشرطة...هنعمل دفعة استثنائية خاصة تتخرج في ٦شهور ...فاكرين شرطة الضبط والربط والنظام في الشارع؟؟
شباب شكله يفرح
شباب يحسس الشعب ان ولاده قامت تحميه
ومش بس كده ...كل الثوار اللي سنهم لاتسمح بالتقدم في هذه الدفعة الاستثنائية هنعمل بيهم شرطة لجان شعبية بشكل مؤقت تتسلح باسلحة خفيفة فقط لطمئنة الشارع
لغاية مالناس تتقدم وتتقبل اعمل مباحثات واستعين بخبرات دول مرت بظروفي واحط مناهج مكثفة للدفعة الاولي ...وبعد ٦شهور تتخرج الدفعة
وطبعا كل الاشكال الوسخة تاخداجازات مفتوحة او معاش مبكر وبكده تكون اول خطوة في معالجة الملف الامني
ثالثا:تستحدث وزارة مخصصة لدراسة مطالب العمال وجميع فئات الشعب في مصر....لجان متخصصة من خيرة اهل العلم مهمتها فقط دراسة كل حالة علي حدا واعطاء توصيات ملزمة ...سواء فورية او اعداد خطط تتسلمها الحكومة القادمة المنتخبة
في هذه الوزارة سيعمل العديد من شباب مصر حديث التخرج كخدمة عامة تحتسب من تاريخه الوظيفي بحيث اوفر لكل حالة سواء مصنع او شركة مثلا مايسمي ب case officer
مهمته التواصل مع الحالة وامدادهم بالمستجدات
ووظيفة هذه الوزارة هي اعداد التوصيات والخريطة الزمنية اللازمة لاصلاح كل مجال
رابعا: الاعلام....اهم حاجة اظلام تام لام التلفزيون المصري...كده ولا كده مالهومش لازمة بشكلهم الحالي
اعادة هيكلة
تجديد شامل للقنوات والغاء بعضها وانشاء الاتي
قناة تسمي قناة مطالب مهمتها الوحيدة التواصل مع الشارع ومطالبه واضراباته...مع وجود لجان"اعلام" في كل وزارة تقوم بعمل تقارير ورفعها للمسئولين
قناة دينية تسمي سماحة...لاول مرة قناة لجميع الاديان وليس الدين الاسلامي فقط..يكون نجومهما من اعلام الازهر وكبار مشايخ الاسلام المعتدل ورجال دين مسيحي مشهود لهم بالاعتدال
قناة اخبارية جبارة وطلب دعم من الجيش....عايزين طيارة هليوكوبتر بقي:)) حاجة كده متطورة
تجديد شااامل للتلفزيون والاذاعة لايخل بالهوية المصرية
خامسا:تغيير شامل في بعثاتنا الدبلوماسية والعمل بنظام المبعوث الخاص....في افريقيا وتركيا واوروبا
العمل بقانون "الدول الصديقة للثورة" ووقف التعامل مع دول الكيل بمكيالين
سادسا:لو كنت من عصام شرف لطورت مايسمي ب"الرقم التصويتي" كل رقم قومي يسجل امامه رقم محمول معتمد ...النظام السابق كان صارم في تسجيل بيانات المحمول عشان يمنع الاضرابات واذا كان مفيش برلمان يمثل الشعب دلوقتي ليه انا ماشركوش واسأله عن رأيه؟؟
هنعمل استطلاعات رأي اسبوعية عشان نعرف الاتجاه والمزاج العام في البلد رايح فين
واذامكانتش الحكومة تشيل جزمة المواطن وتبوسها الف مرة بعد الثورة وتتأسف له علي اللي عملته فيه سنين وسنين هنعمل كده امتي؟؟؟
بس ولغاية كده رجلي خبطت في شباك السرير وصحيت....
ليست هناك تعليقات:
إرسال تعليق